عراقيّة أنا

يالتسأَل عليْ وانتَ أَدرَه ْ بالحال

حزينة الروح مِن يوم الوطن عفته ْ

غَريبة دار  تـدري وشبـَعتْ هـموم

ونهش گلبي الحزن والفرَح ماضگته

خلـصْ عمري إبَّچي وبوداع الاحباب

وعلى خدّي الدمع من دمــاي أكتَّه

وأشوفن  ناسـه تنـذبح كل يــوم

والطائفيَّه من الشعب باگتْ ضحكْته

مثل مركب يهيــم بـلـيــَّه اشراع

وقبطانه حاير بيـه ومتَيِّه وَجهتَه

ماتبَّدل حاله وبقه نفس ذاكَ الحال

ومابيهم المد ْ إيده و نشَّف دَمعته ْ

نفس ذاك الضيم بس تغيِّرَت الوجوه

وچماله هالارهاب صَـب عليه لَعنْتَه

شگد حـلمتْ نـردْ لديارنـه بيـوم

وأشوف الــوطن خلصانـه محنـتـه ْ

وأرتوي بماي دجلة وأغتسل بيه

وأگعد على ضـفافه وبفيَّة نخلته

وأشـكي جرحي لكل هلي الطيبين

عله سيف الغربة الشلَّتني طعنته

أثاري چنِتْ أبـني عالوَهمْ آمـال

وعن بالي الحلم من گاعه شلتـه ْ

عـراقيًَّة أَنا وبـس بالأسم ظلّيت

مشردة والاغراب تتنعَم ْ إبجنــته ْ

ياوسفه عفنه الوطن بيد اليجزرون

وكل واحد يتاني من الذبح حصته

گلي يازَمـنْ منّا بَـعـد شـتـريـد

ماكَفـّاك من ْ عمرنه اللي أَخذتـه ْ

كافي مو بينَه لعَبتْ أشكال وألوان ْ

 صبَرنهْ صبرْ أيوب والصبر إمتحنتهْ

وأدعي عله الخلانَه بـهاذه الـحال

 مِن عَساها إن شـالله بـحظَّه وبَخته ْ