في ذكرى وفاة أمي رحمها الله كتبت هذه القصيدة:
عگب عينـچ ييـمة شلّي بالروح
ماتـرّاد دنيه أنتِ مــو بيهه
يمه من شـلتي وهجرتي البـيت
ليش وياچ روحي ماأخـذتـيـهه
شكثر تـمنيت آنــه بمكانـچ
ولا عيني عليچ بيـوم أبچيــهه
يريحة طيـب ريحة جنة بالگاع
شنهو ريحتـچ بـس گولي وصفيهه
حزنت عليــچ حزن الگاع للماي
من تعطش قوي وتجف ســـواگيهه
وحزن عليــچ الكـون والجيران
والركبـان لمـن حده حـاديـهه
وبلابل سدرتنه التغنّي طول النهار
أنگلب غناهه نواح بساعة العفتيهه
دموعـي على ذكرچ تـصب نهران
وحـگ رب السمه ماسيـطر عليهه
تجيلي بطيف چَـمْ ليـلة واگـلچ
ليش الغيبة يحبـيـبة تطولـيهه
وشيـلـتـچ أم ريـحة الهيـل
كل ليـلة حـدر راسي أخـليـهه
عشـر سنين مــن رحْتِ للـيـوم
عزاچ بروحي الماگدرت أداويهه
كل وجعـات الگـــلب ألهَهْ دوهْ
ووجعـة فراگچ مافاد الدوه بيهه
عمت عينك يموت أشكثر مكروه
شصار لو مريت من يمهه ومخطيهه
يانظر عيني أنا بكل ساعة أدعيلچ
وأگولن ربي من رحماتك أنطيهه
وأصـبر نفسـي لأن أوفاها حگهه
من حط الجنة كلهه تحت رجليهه
ليست هناك تعليقات:
إرسال تعليق