قيَّـم الرَگـّاع مـن سـاسـة هَــلي
رَبْعـچ ألتَــمَّـوْ يـحسـنَه هـَلهِـلي
قـيَّـمْ الرگـّاع مـن هـالـسـاسَــه
شعَبنـه صار بضيمْ وتعِبَـتْ ناســه
وبالطائفيَّـة والفتَن لعْبَو براسـه
ماندري شوَكِتْ يرتاح وهمَّه يـنْجلي
قَيَّـم الـرگـّاع من سـاســة هـلي
وسـفَه هالبلد صفه بـَس للحراميـَّه ْ
وتفَـرْهّدْ مالَـه لَمَّـن غـفه راعِـيّه ْ
والمعَمَّم فـتَهْ أو لِعَب چـــوبيـه ْ
مَگرود المواطنْ صار بـيهُم مبتلي
قيَّـمْ الرَگـّاع مِــن سـاسَـةْ هَـلي
إسـألو التاريـخْ علَ مَـدْ الـدَهَـرْ
هَم ذكـَرْ واحد على الكُرسي عُــمَرْ
والشاطر يگول آخذ من الدرس العِبَرْ
لو دامَت لغيري چان ماوصْلَتْ إِلي
قيَّـمْ الرَگـّاع مِـن سـاسَـة هَلـي
شَعـبي الصابرْ أبدْ ماضاگ فَرحَهْ
ثلاثيـن من العُـمر ما طلَعْ صبحهْ
جـوع وفقــر ومتوسـدْ على جرحه
والعالِمْ بحاله بَس تَره ربَّهْ العَلي
قَيَّـم الرگّاع مـنْ سـاسَة هــلي
مسكين المُواطن شافْ بـَس الشـين ْ
چـان بوحـدَة صارْ انّوب بـثنـين ْ
ومايـدري زِمانَه ماخـذه لـويــن ْ
ساكتْ تشوفـَهْ والگلبْ يغلي غَـلي
قيَّم الرگّـاع مـن سـاسَـة هَــلي
صدَّگ الشعب من فتَـو بالدسْـتــورْ
وانْغرَه بألقابهم منْ عالمِ ودكتورْ
طاح قـْناعهُم وانكشَفْ المَسـتـورْ
يا شـعوبي منهم إشتـتأمَـلي
قيَّـم الرگـّاع من سـاسـَـة هـَلي
ليست هناك تعليقات:
إرسال تعليق